2020年6月8日 星期一

勸退

勸退

有好多家長都關心,升小一後,如果小朋友跟唔上,學校會否被勸退。

試想想,當錯配小學的情況發生了,小朋友長期追唔上課程進度,後果可能會好嚴重⋯⋯

小朋友長期處於追趕課程的狀態,放棄玩樂時間,吃力温習亦未能取得理想成績,久而久之就會失去學習興趣,成績更加可能每況越下。

當然每個小朋友都可能有不同的「花期」,下個學期可能追得番,呢個亦係好多家長俾自己嘅藉口。

但我個人覺得,最多睇三個學期,如果保持級尾十而且已經無心機返學,就應該主動懸崖勒馬,不應等人勸才退。

其實,選校真係要適合,如果程度真係相差太遠,轉個環境,未嘗唔係一件好事。

不過,我都明白,知易行難,唯有時刻自省,勿忘初心。

2018年9月7日 星期五

奧數 與 升中 的關係

我覺得學奧數係興趣班,有興趣先至好去玩,同畫畫、游水、彈琴一樣,幫唔到呈分試,如果有好成績,對升中可能有少少幫助。

https://topick.hket.com/article/1441205/%E5%B0%8F%E5%AD%B8%E5%A5%A7%E6%95%B8%E9%A1%8C%E9%86%AB%E7%94%9F%E9%83%BD%E8%80%83%E8%B5%B7%20%E3%80%8030%E7%A7%92%E5%85%A7%E4%BD%A0%E7%AD%94%E5%88%B0%E5%97%8E%EF%BC%9F

港大教育學院教授梁貫成則認為,奧數題目比一般數學題刁鑽,建議家長讓學生自由選擇;有些家長誤以為學奧數有助提升計數能力,但他指出,大部分奧數內容與校本數學課程無關,強逼子女學奧數或造成反效果,令他們對艱深的數學有恐懼而失去興趣。

教育大學數學與資訊科技學系署理系主任陳偉康強調,學習奧數如同學習芭蕾舞,應考慮子女是否有興趣,沒有特別年齡限制。

2018年8月31日 星期五

溫馨提示 • 調節期望

提提各位準小一家長:

.視乎小朋友能力而訂下目標、期望。
.先注重學習態度,繼而所學知識,然後才留意成績分數。
.初小測考,85和100分在學術智識上分別不大,只是小不小心,專不專心和認不認真的分別。
.另一直接影響失分嘅關鍵就係寫字,口答識哂,但係唔識寫。都係「分數」未能直接反映所學知識的情況。
.認清失分四關鍵:唔小心、唔識寫、唔記得、唔明白。(小一絕大部分都不會因為唔明白而失分。)
.要語文進步,不可急於一時,操卷比較短線,閱讀才是正途。
.靠補習才能免強追上學校課程就有點不健康,選校可能有錯配。
.學期初多留意小朋友的功課,了解學校課程內容及小朋友的能力,調節自己對小朋友的期望。

46/48 Simon

2017年12月13日 星期三

奧數與珠心算

奧數與珠心算

奧數同珠心算都係興趣班,唔好寄望會幫到「數學科」好多,奧數主要訓練邏輯思維,珠算着重四側運算。極其量幼兒學珠心算有機會幫到20以內加減,確實有助小一數學。

至於擔心珠心算會否影響數學科,我覺得機會不大,首先珠心算只教四則運算,與邏輯無關,除非小朋友對「數字和數目」的基本概念未能掌握,就可能對五進同十進有少少混淆,不過小一生應該分得清。

至於幼兒學奧數,我覺得有D呃錢,內容極淺,基本上課程範圍與幼稚園相約,無需嘥錢嘥時間出去上。商場書展20本一年班奧數,你自己教都得。

我個人覺得,如果有興趣,幼稚園上珠心算,小一/二開始學奧數比較適合。

46/48 Simon
20170728

2017年12月7日 星期四

護脊書包

護脊書包


長期揹不合適書包可使學童高低膊及寒背,長遠更會影響脊骨發展。

最基本要做到以下四點:

1)五點式承托 - 雙肩帶、胸帶及腰帶,將書包重量平均分散。 (其實腰帶係減輕脊骨負重嘅最大關鍵,不過好多小一生矮小腰幼,很多時沒有索緊腰帶,做不到重力轉移嘅最佳效果。)
2)背部要有硬板 - 防止袋中硬物傷及脊背。

3)接觸身體部份要有舒適軟墊 - 肩帶夠闊、背墊夠厚要有通風、腰帶盆骨頂受力位要舒適。

4)書包內有貼背的隔層 - 使重物緊貼背部,防止書本向外傾斜,導致重心外移。


選購考慮:

1)護脊功能
2)體形式合
3)價錢
4)能放F4 size
5)重量、款式、操作、rain cover、水壺袋、其他。


提提大家,重量係一般家長都會考慮嘅因素,我都同意需要考慮,但估計應該沒有大家想像中那麼重要。

普遍大牌子護脊書包重 800g至1000g,相差唔夠200g,中、英、數是旦一本書都250g - 300g,值唔值得用接近貴成倍價錢,去買一個輕唔夠一本書嘅書包呢,真係見仁見智。留意有D書包無咗胸帶同腰帶,真係可以輕好多,但係無咁護脊。


個人感覺,五、六百蚊,8xx - 900g,有齊以上護脊四點,算好合理。

46/48 Simon

2017年12月5日 星期二

個字點寫

個字點寫

一個經常發生的問題,家長寫個字同小朋友學校學個字唔同寫法,又或家長覺得個字啱,但老師又話錯,又要改正又要叩分。

*家長先不要在小朋友面前說老師錯,更不應負評老師吹毛求疵,矯枉過正。這樣會令小朋友減低對學校老師的信任,令小朋友無所適從,影響學習。* 


其實好多字都與我們小時候學的有分別,筆順都可能有出入,畢竟中、港、台的筆順規則都有一些不同,難搞的是筆劃,甚至字形都不同,就呢個竪心邊(忄),我以前都唔係咁寫,仲有草花頭、女字部、食字部等都同細個學嘅有少少出入,另外個晚字,以前係咁寫:晩,而家咁寫:晚,大家睇唔睇到個分別?

己、已、巳 都是只差一點點,字意已經很不同,相信從小鞏固及統一是好事。

其實日常見到嘅字,唔同字款,唔同書體,個字都可能有少少唔同。但小朋友學字、正字,點都應該有個標準。

教育局就定了「楷書」為標準字體,而筆順、筆劃、字型就以「香港小學學習字詞表」為標準。政府有網站規範小學階段所有會學到的字:http://www.edbchinese.hk/lexlist_en/
以上網站如手機睇要用puffin開

另外有有心人根據政府網站資料寫咗個apps,個人認為係家長必備😉。

呢個都唔錯,但只有iOS版。
https://appsto.re/hk/QiYhhb.i

其實仲有好多例子,如 告、電、船、周、服和胸的那個「月」字部⋯⋯
所以,教小朋友寫之前,最好 check check 先😜😜😜。

46/48 Simon

如何適應小一生活



小朋友很快就會成為一個小學生,在這忙碌選校的日子,有沒有想過如何為小朋友適應小學的新生活呢!又有沒有想過有什麼需要準備,用一個暑假去準備又是否足夠呢! 首先無論家長或小朋友都應該預先知道幼稚園和小學的分別,好有一個心理準備。(見上圖 <picture source:政府網頁> ) 我覺得,適應小一生活可以從以下三方面著手考慮:
  1. 如何適應學校生活(社交、環境)
  2. 改變家庭生活習慣(作息時間、飲食健康)
  3. 提升學習能力(專注、記憶、閲讀、守規、自理)

何時開始,需要多久去預備、適應,因人而異,但我覺得,需要最長時間,欲速則不達的,更不能拔苗助長的,相信是如何準備好提升學習能力以應付傳統初小。



注意:提升學習能力,並不等如提升學術水平。



提升學習能力以適應傳統初小 

專心培育一個反斗,調皮,鬼馬,講到玩,無時停,愛研究,愛發問,愛說話,愛創作,愛嘗試,愛模仿,活潑好動,喜愛玩樂的小朋友,去適應一間努力栽培小朋友成為品德高、學問好、身體健的傳統官津小學。

  1. 學懂專注(有助上堂、做功課)
  2. 增強記憶力(有助默寫、串字)
  3. 使閲讀成為習慣(鞏固語文基礎)
  4. 盡責任、守規矩、懂自理(寫家課冊、交功課、舉手發問、排隊、坐定、用膳)
  5. 加強訓練小肌肉(為應付小學大量書寫作好準備)
從現在起,慢慢培養。

至於如何能學懂專注、如何增強記憶力、如何使閲讀成為習慣、如何使小朋友能盡責任、守規矩、懂自理等網上大把方法,亦歡迎大家在此分享心得。

以專注為例,可以嘗試初階段以十分鐘為目標,慢慢加長時間,而吸引坐定定的內容,開始可以玩為主,例如切圖、找不同、數獨等都可以,其實都是google search,見啱就用,主要係桌上遊戲,讓小朋友安坐。習慣後則轉為學習為主,終極目標,能接受個半至兩小時的專注學習,相信習慣後對上堂及做功課都有很大的幫助。

從今天起,每天完成幼稚園功課後,不要立即離枱,從上面四項中選擇合適材料,加以訓練。每階段加長一點時間,日子有功,定當成功在望,大家加油💪🏻💪🏻💪🏻!

至於大家可能小時經歷過的傳統絕招:
"凶、訓、駡、罰、打"能否提升學習能力或幫助適應小一新生活,請家長自行評估。


再次提醒:提升學習能力,並不等如提升學術水平。



46/48 Simon